تكنولوجيا

المجهول - الجزء الثالث
كل ما يجب أن تعرفه عن عملة الفيسبوك

يه خبر بقالوا حوالي أسبوعين او اكتر و قالب الدنيا و انا يعتبره انه هيبقي ثورة خطيرة جداً هتغير الأوضاع الاقتصادية بدأية من اول السنة الجاية يعني قريب جداً جداً و بالرغم من كده العالم العربي السعيد ملهوش اي علاقة و لا اهتمام و طبعاً صفحاتنا العربية عايشة في مية البطيخ و مهتمة بس بفخر العرب و تصريحاته و مدرسته الصنايع و الكورة و دورة الألعاب في الوقت اللي الخبر ده فيه يعتبر اهم و اخطر خبر في ٢٠١٩ و يمكن في التاريخ كله من غير لا مبالغة و لا افورة! الخبر باختصار هو : شركة الفيسبوك و مارك زوكربيرج أزاحوا الستار عن مشروع ضخم لاصدار عملة رقمية جديدة بتقنية البلوكتشين يعني زاي البيتكوين كده!

هل ده الخبر ده هو الخبر الأهم و الأخطر في التاريخ؟ بصراحة آه و بدون افورة، الفيسبوك يعتبر النهاردة اكبر كيان في تاريخ البشرية، عدد المشتركين فيه بيوصل ٢،٢٣ مليار مشترك نشط (ده بإحصاء يونيو ٢٠١٨ فقط) يعني بالعربي كده لو ١٠٪؜ فقط منهم (وديه نسبة اقل من الرقم الواقعي المتوقع) قرروا في اول يوم من طرح العملة فتح محفظة إلكترونية و اشتري كل واحد عملة ليبرا بما قيمته ١٠٠ دولار فقط، يبقي العملة ديه هيبقي عندها احتياطي يساوي رقم من التريولانات من الدولارات يعني ده هيبقي اكبر بنك مركزي في التاريخ! إنتوا مستوعبين المعلومة ديه؟؟ يعني ممكن البنك المركزي بتاعنا في مصر يتباع بربع جنيه اخضر مشمشي

طيب ازاي العملة ديه بتشتغل؟ ابداً من الموضوع من اسهل ما يمكن انت بتفتح محفظة إلكترونية و بتحول عملة من العملات الرئيسية زاي الدولار او الين او اليورو او غيرهم لما يساوي قيمته بعملة الليبرا! هم لم يحددوا قيمتها حالياً بس في القريب العاجل و تقريباً هتبقي قيمتها ١دولار! بعد كده بتقدر تدفع او تشتري اي حاجة او تحول فلوس و ممكن المستلم يغيرها في اي بنك لأي عملة

وايه مميزات العملة ديه؟
العملة ديه أولاً هيكون سعرها ثابت و لذلك فمش هيبقي فيه اي مزايدات او مضاربات عليها و ده معناه انك متحاولشي تتذاكي و متفكرشي في الاستثمار فيها بس هي ممكن تستخدمها في استثمارات اخري ممكن ابقي اكتب عنها بعدين ! الحاجة التانية و الأهم ان اي تحويل هيتم مش هيبقي فيه عليه اي رسوم تحويل يعني ده معناه ان ويسترن يونيو و شركات تحويل الأموال كده هيبيعوا ترمس او درة علي الكورنيش! طبعاً ده غير سرعة التحويل و الأجمل انك لما تستلم التحويل و تروح تحوله لدولار او اي عملة مش هتدفع كمان رسوم او عمولة! إنتوا متخيلين بقي شكل التجارة و غيره هيبقي عامل ازاي؟

ايه الضمانات بتاعة العملة ديه؟
ضمانات ايه يابا الحاج؟ تعرف مين الكيانات المشاركة في العملة ديه و اللي دفعت كل واحدة منهم سهم بقيمة عشرة ملايين دولار للمساهمة في رأس المال؟ خد عندك شركة Visa و مستر كارد من مقرهم في سويسرا و دونا المشرفين الأساسين ، و خد عندك paypal و بالمناسبة مديرها هو هيبقي مدير كاليبرا اللي هي الشركة او البنك المركزي اللي هيقدر العملة، كمان معهم شركاء شركة أوبر و إيباي و ڤودافون و ميرسي كوربوريشن و شركة بوكينج لحجز تذاكر الطيران و الفنادق و كيانات تانية عملاقة كل واحدة منهم دفعت ١٠ مليون دولار زاي ما قلت كسهم في رأس المال المؤسس اللي هو هيبقي في اول يوم من طرح العملة تريليونات

طيب هل ده هيأثر علي البيتكوين و هيردمه؟
طبعاً إنتوا عارفين اني من المضاربين و المنقبين عن البيتكوين و العملات الإلكترونية التانية، فأحب أقول لكم بكل أريحية ان البيتكوين مسجل في اللحظة ديه ١١ الف و ٤٦٢ دولار للعملة الواحدة (زيادة عن الامس فقط ب٤٦٩،٢٢ دولار) يعني بصراحة موضوع ليبرا ده جاء في صالح البيتكوين مش ضده و انا أتوقع انه بالوصول لأول السنة الجديدة و طرح العملة الجديدة ليبرا هيرتفع البيتكوين تدريجيا علشان يوصل في اليوم ده لمستوي ١ الي ٢٤ او ٢٥ الف دولار

العالم بيتطور بسرعة رهيبة و بشكل حتي مش هيدينك لحظة تفكر او تستوعب، انا كتبت عن ده و قلت استثمر وقتك و أتعلم تقنية البلوكتشين علشان ده المستقبل ، حضرتك عاوز تشغل نفسك بمحمد صلاح و قال ايه و قالوا ايه براحتك بس افتكر ان قطار المستقبل اسرع من مستوي إدراكنا ! و كلمة اخيرة كل ده ملهوش علاقة بانك صاحب مبدأ و قضية و عقيدة بل العكس ده جهاد لصالحها! المعلومة قوة ، فأعدوا لهم ما استطعتم من قوة

لمشاركة المقالة علي صفحتك في الفيسبوك، اضغط علي كلمة شير

التعليقات

مواضيع ذات صلة